काठमाडौं,२ साउन । काठमाडौं को तारकेश्वर नगरपालिका–५ गोलढुङ्गामा स्थानीयको कुटाइबाट एकजना निर्दोष व्यक्तिको मृत्यु छ ।

टोलवासीलेचोरी गर्न आएको व्यक्ति ठानेर स्थानीयले कुटपिट गर्न थालेपछि रसुवा घर भई कपुरधारा बस्दै आएका छिरिङ लामाको मृत्यु भएको हो ।अर्का एकजना दार्जे तामाङ भन्ने व्यक्ति घाइते भएका छन् ।

काठमाडौं प्रहरी प्रमुख एसएसपी श्यामलाल ज्ञवालीका अनुसार घटना तारकेश्वर नगरपालिका ५, गोलढुंगाको हो । मध्यराति दुईजना मादक पदार्थ सेवन गरेर गएपछि उनीहरुले पनि होल्ला गर्न थालेपछि एक घरको कुकुर भुकेको थियो ।परिवारका व्यक्ति पनि बाहिर निस्किएका थिए । र, विवाद बढेको थियो ।

पछि उनीहरु भागेपछि चोर, चोर भन्दै कराएपछि सर्वसाधारणले उनलाई ढुंगा हानेको पाइएको प्रहरीले जनाएको छ । घटनाबारे जानकारी पाएलगत्तै पुगेको प्रहरीले लामालाई त्रिवि शिक्षण अस्पताल, महाराजगञ्ज पठाएको थियो । तर, अस्पतालले मृत घोषित गर्‍यो ।

बालाजुका डीएसपी रंजितसिंह राठौरका अनुसारउनको टाउकोमा चोट लागेको पाइएको छ। अहिले दुई जनालाई पक्राउ गरेर विस्तृत अनुसन्धान थालिएको ज्ञवालीले बताए ।