भक्तपुर, २६ भदौ । मध्यपुर थिमि नगरपालिका- ९ निकोसेरास्थित एकै परिवारका ३ जना शंकास्पद मृत फेला परेका छन् । महानगरीय अपराध महाशाखाका एसएसपी दीपक थापाले एकै परिवारका तीनजनाको शंकास्पद मृत्यु भएको पाइएको बताए ।

३६ वर्षीय सुदिप अधिकारी, उनकी श्रीमती ३४ वर्षीया सम्झना अधिकारी र १५ वर्षीय छोरा सुशान्त अधिकारीको शव घरमै फेला परेको महानगरीय प्रहरी वृत्त प्रमुख डीएसपी ऋषिराम कँडेलले जानकारी दिए । उनले भने, हामीले अनुसन्धान थालेका छौं । यसमा संलग्नलाई पत्ता लगाएर सार्वजनिक गर्ने उनले बताए ।

मृतकका भाइ सुनिल अधिकारी घरमा आइपुग्दा घरको दोश्रो तल्लामा कुकुर र सम्झना अधिकारीको शव, तेस्रो तलामा सुशान्त र माथिल्लो तलामा सुदिप अधिकारीको शव फेला परेको प्रहरीले बताएको छ ।

प्रहरीका अनुसार हत्या केही दिन पहिले भएको र घटना कहिले भएको र कसले गरेको भन्ने अनुसन्धान भईरहेको बताए ।