गण्डकी, १९ पुस । पछिल्लो समय लोकप्रिय गन्तव्यका रुपमा विकसित हुँदै गइरहेको मर्दी हिमालमा ‘समर स्की’ महोत्सव हुने भएको छ । दिगो हिमालयन कोषको आयोजनामा मर्दी हिमालको आधार शिविरमा महोत्सव हुने भएको हो ।

आयोजक संस्थाका सदस्य प्रभात अधिकारीका अनुसार आठाैँ चरणको महोत्सव यही फेब्रुवरी १० देखि १८ ९माघ २७ देखि फागुन ३० सम्म गर्ने तयारी भइरहेको छ । नेपालमा स्की पर्यटनको विकास गर्ने मुख्य लक्ष्यका साथ महोत्सव गर्न लागिएको जनाउँदै उनले महोत्सवलाई ‘ग्रेट हिमालयन स्की’ भ्रमण नाम दिइएको बताए । महोत्सव सम्पन्न गर्न रु १६ लाख खर्च लाग्ने अनुमान गरिएएको छ । उक्त खर्चअन्तर्गत सबैभन्दा बढी बिमामा छुट्याइएको छ । महोत्सवमा भाग लिनेको बिमाका लागिमात्र रु दुई लाख २० हजार विनियोजन गरिएको अधिकारीले जानकारी दिए ।

आयोजक संस्थाका अध्यक्ष रामबहादुर थापाका अनुसार मर्दीमा गर्न लागेको स्की महोत्सव यसअघि मनास्लु, कालिञ्चोकलगायत स्थानमा सम्पन्न गरिएको थियो । अन्तर्राष्ट्रिय स्की प्रशिक्षक कृष्ण थापामगरको प्रशिक्षण तथा सहजीकरणमा यो महोत्सव हुन लागेको स्थानीय व्यवस्थापक सुदीप गौतमले जानकारी दिएका छन् । यो महोत्सवले मर्दी हिमाल पदयात्राका लागि प्रचारप्रसारमा सहयोग पुग्ने उनको भनाइ छ । महोत्सवमा संस्कृति, पर्यटन तथा नागरिक उड्डयन मन्त्रालय (सङ्घ), गण्डकी प्रदेशको उद्योग, पर्यटन मन्त्रालय, नेपाल पर्वतारोहण सङ्घ, टान, गण्डकी अल्पाइन क्लबलगायत विभिन्न संस्थाको सहकार्य रहनेछ । महोत्सवमा सबै क्षेत्रका मानिसले भाग लिन पाउने जनाइएको छ तर आयोजकले भने, पथप्रदर्शक, हिमाल आरोहण गाइड तथा पर्यटन क्षेत्रमा काम गरिरहेकाको सहभागितामा जोड दिएको छ । महोत्सवमा प्रत्यक्ष र अप्रत्यक्ष गरी ३०० बढी व्यक्ति लाभान्वित हुने विश्वास गरिएको छ । नेपालको आन्तरिक पर्यटनको प्रवद्र्धन हुने, नेपालको पर्यटनमा नयाँ क्रियाकलाप थपिने, स्कीसम्बन्धी सीप हस्तान्तरण हुने, नेपालको पर्यटन सबै मौसमका लागि भन्ने नारा स्थापित हुने स्थानीय व्यवस्थापक गौतमले विश्वास व्यक्त गरे ।

नेपाल पर्वतारोहण सङ्घ गण्डकी प्रदेशका अध्यक्ष शेषकान्त शर्माले मर्दी हिमालमा हुने स्की महोत्सवले कोरोनाकालमा थलिएको पर्यटनलाई चलायमान बनाउने विश्वास व्यक्त गर्दै महोत्सवमा सहकार्य गर्न पाउनु नेपालको पर्वतारोहण पर्यटनमा नयाँ आयाम थपिने विश्वास लिइएको बताएका छन् ।