काठमाडौँ, २२ असोज । लामो रस्साकस्सीपछि सत्तारूढ गठबन्धनले प्रतिनिधिसभाको सिट भागबन्डालाई अन्तिम रूप दिएको छ । जनता समाजवादी पार्टीलाई दिन भनिएको क्षेत्रहरू खाली राख्दै चार दलले आ–आफ्नो क्षेत्रमा सहमति गरेका हुन् ।

गठबन्धनले १६५ सिटमध्ये १६१ सिटको भागबन्डा मिलाएको हो । तर, यो सूचीमा शनिबारसम्म तलमाथि हुन सक्ने छ ।

प्रधानमन्त्री निवास बालुवाटारमा शुक्रबार बसेको गठबन्धनको बैठकले नेकपा (माओवादी केन्द्र)लाई ४५, नेकपा (एकीकृत समाजवादी)लाई २० र राष्ट्रिय जनमोर्चालाई २ सिट दिने गरी बाँडफाँड गरेको हो ।

बाँकी ९८ स्थानमा कांग्रेस र लोकतान्त्रिक समाजवादी पार्टीबीच बाँडफाँड हुने जनाइएको छ । अहिले १२ क्षेत्र खाली राखिएको छ । त्यही १२ क्षेत्र लोसपालाई दिएर कांग्रेस ८६ मा बस्न सक्ने जनाइएको छ ।

गठबन्धनले विवादमा रहेको बाँकी ४ सिटमा पनि शनिबारसम्म सहमति गर्ने भएको छ । शनिबार नै सहमति पत्रमा हस्ताक्षर गरेर २३ गते मनोनयनका लागि गठबन्धन तयार हुने भएको छ ।

हेर्नुस् गठबन्धनका दलहरूबीचको भागबन्डा