मस्को, २५ असोज । रुसलाई क्रिमिया जोड्ने पुलमा विष्फोटको बदलामा रुसले सोमबार युक्रेनी सहरहरूमा बमबारी गरेर सर्वसाधारणको हत्या र पूर्वाधारमा ठुलो क्षति गराएको छ । आक्रमणमा रुसले इरानी ड्रोन प्रयोग गरेको युक्रेनी राष्ट्रपति भोलोदिमिर जेलेन्स्कीले बताएका छन् ।

राजधानी किभ र दक्षिण पश्चिमका सहरहरूलाई लक्षित गरी घातक हमला भएको देशको सेना प्रमुखले बताएका छन् । युक्रेनमा कम्तीमा ७५ वटा मिसाइल प्रहार गरेको उनले बताएका छन् ।

केही साताको अन्तरालपछि रुसी सेनाले शृंखलाबद्ध हमला गरेको थियो । हमलामा देशको ऊर्जा पूर्वाधारमा पनि ठुलो क्षति भएको राष्ट्रपति जेलेन्स्कीले बताएका छन् ।

‘हामी आतंककारीहरूसँग लडिरहेका छौँ । दर्जनौँ मिसाइल र ड्रोनले देशभरका ऊर्जा फ्यासिलिटिजमा निशाना बनाइएको छ’, जेलेन्स्कीले सामाजिक सञ्जालमा लेखेका छन् ।