काठमाडौं, १५ असार । कोभिड-१९ क्राइसिस म्यानेजमेन्ट सेन्टर (सीसीएमसी) ले अनिवार्य होम क्वारेन्टाइनमा बस्ने प्रतिवद्धतासहित स्थानीय तहबाट सिफरिस लिएर आउनेलाई उपत्यका प्रवेश दिने निर्णय गरेको छ ।

सोमबार बसेको सीसीएमसीको बैठकले स्वास्थ्य तथा जनसंख्या मन्त्रालयको मापदण्ड अनुसार होम क्वारेन्टाइनमा बस्ने प्रतिवद्धतासहित स्थानीय तह, वडा कार्यालय र प्रहरीको सिफारिस लिएर आएमा उपत्यका भित्रिन दिने निर्णय गरेको हो ।

हवाई तथा स्थलमार्गबाट आउने सबैमा सो निर्णय लागू हुने प्रधानमन्त्री तथा मन्त्रिपरिषद् कार्यालयका सचिव महेन्द्र गुरागाईंले बताए । सीसीएमसीले क्वारेन्टाइनहरुमा स्वास्थ्य सामग्री वितरण गर्न मन्त्रालयको अनुमति पनि अनिवार्य गर्ने निर्णय गरेको छ ।

यस्तै विमानस्थलका कर्मचारीहरुलाई स्वास्थ्य सुरक्षाका सामग्रीहरु प्रतिव्यक्ति २ जोरका दरले वितरण गर्ने पनि निर्णय गरेको छ । साथै, आमा र बच्चा नेपाली नागरिकताधारी र बुबा विदेशी पासपोर्ट भएकाहरुको भिसा सहजिकरणका लागि निर्णय गर्न मन्त्रिपरिषदलाई सिफारिस समेत गरेको छ । आन्तरिक उडान सञ्चालन र लकडाउनका विषयमा आजको मन्त्रिपरिषद बैठकले थप निर्णय गर्न एक मन्त्रीले बताए ।