वीरगञ्ज, २२ साउन । वीरगञ्जको गण्डकमा रहेको अस्थायी कोरोना अस्पतालमा बिहीबार विहान साढे ८ बजे मृत्यु भएका व्यक्तिमा पनि कोरोना सङ्क्रमण रहेको पुष्टि भएको छ ।

गण्डक अस्थायी कोभिड अस्पतालका कोर्डिनेटर डा उदयनारायण सिंहले शंकास्पद कोरोना रोगीको रुपमा वीरगञ्जको गण्डकमा रहेको अस्थायी कोरोना अस्पतालमा उपचारकाक्रममा विहीबार बिहान साढे ८ बजे मृत्यु भएका व्यक्तिमा पनि कोरोना सङ्क्रमण रहेको पुष्टि गरे ।

बिहीबार साँझ आएको पिसिआर रिर्पोटमा कोरोना पोजेटिभ देखिएको गण्डक अस्थायी कोभिड अस्पतालका कोर्डिनेटर डा सिंहले जानकारी दिए ।

वीरगञ्ज महानगरपालिका– १० आदर्शनगरका ५६ वर्षीय पुरुषको बिहीबार विहान मृत्यु भएको हो । मधुमेह र मुटुरोगी ती पुरुषमा श्वास प्रश्वासमा समस्या आएपछि साउन २० गते साँझ नारायणी अस्पताल अन्तर्गतको कोरोना विशेष अस्पताल गण्डकमा शंकास्पद कोरोना रोगीका रुपमा भर्ना गरी उपचार सुरु गरिएको थियो ।

अवस्था गम्भीर बन्दै गएपछि गएराति १० बजेतिर भेन्टिलेटरमा राखेर उपचार सुरु गरिए पनि बिहीबार विहान उपचारकै क्रममा मृत्यु भएको थियो । पर्सामा मृत्यु हुने सङ्क्रमितको संख्या १८ पुग्यो भने साउन महिनाका २२ दिनमा मात्र १५ जना सङ्क्रमितको मृत्यु भइसकेको छ । यो सगै नेपालमा कोरोनाबाट मृत्यु हुनेको संख्या ६६ पुगेको छ ।