पोखरा, १० चैत । जिल्ला प्रहरी कार्यालय कास्कीले हत्याको अभियोगमा फरार रहेका एक यूवकलाई झण्डै नौ वर्षपछि पक्राउ गरेको छ ।

पर्वतको मोदी गाँउपालिका वडा नं. ८ चित्रे का २५ वर्षीय दिपक विक भनेर चिनिने शिरिस विकलाई कास्की प्रहरीले पक्राउ गरेसँगै आज सार्वजनिक गरेको हो । कास्की प्रहरीका अनुसार प्रतिवादी विकले २०६९ सालको कार्तिक २५ गते पोखराको लेकसाईडस्थित १६ वर्षिय मिथुन विकको हत्या गरि फरार थिए । जिल्ला प्रहरी कार्यालय पर्वतको सहकार्यमा प्रतिवादी विकलाई कास्कीको अन्नपुर्ण गाउँपालिका वडा नं. ५ सल्यानबाट हिजो पक्राउ गरिएको कास्की प्रहरी प्रमुख प्रहरी उपरिक्षक रमेश थापाले बताए । एसपी थापाका अनुसार हत्यापश्चात हालसम्म फरार रहेका विक लामो समय भारतमा लुकीछिपी बसेका थिए । हत्या अभियोगमा सो समयमा विक सहित अन्य २२ जनामाथी हत्या गरिएका मिथुनको परिवारबाट जाहेरी समेत दिईएको थियो ।