मोरङ । नेकपा एमालेका अध्यक्ष केपी शर्मा ओलीले पाँच दलीय सत्ता गठबन्धनको आयु असार १७ गते अन्त्य हुने जिकिरे गरेका छन् ।

एमालेले विराटनगरमा आयोजित चुनावी सभालाई सम्बोधन गर्दै अध्यक्ष ओलीले सत्ता गठबन्धनको आयु असार १७ गते अन्त्य हुने बताएका हुन् ।

उनले भने, ‘‘प्रधानमन्त्री तथा कांग्रेस सभापति शेरबहादुर देउवाजी ज्योतिषीमा धेरै विश्वास गर्नुहुन्छ । त्यसैले जेठ र असारको महिना कस्तो छ, बोलाएर सोध्नु होस्,’ उनले भने, ‘असार १७ गते कस्ता नक्षत्र र ग्रहहरु छन्, ज्योतिषीलाई बोलाएर हेर्नु होस् भनेको छु, बिचराहरुको सातो गएको छ होला ।’

उनले असार १७ गते गठबन्धन कसरी समाप्त हुन्छ भन्नेबारे भने केही खुलाएनन् ।

गठबन्धन दलहरूलाई लक्षित गर्दै उनले एमालेसँग एक्लै लड्ने हिम्मत नभएका दलहरूले देश बनाउन नसक्ने पनि बताएका थिए । उनले भने, ‘एमाले एक्लै लड्छ र गठबन्धनका पाँचै भाइलाई वैशाख ३० गतेपछि एउटै बट्टामा प्याक गर्छ ।’

ओलीले शनिबार एकै दिन सुनसरीको इटहरी र धरान र मोरङको विराटनगर र विराटचोकमा एमालेले आयोजना गरेको चुनावी सभालाई सम्बोधन गरेका थिए ।