धनकुटा २ जेठ,। धनकुटाको साँगुरीगढीको अध्यक्षमा नेपाली कांग्रेस र चौबिसेमा नेकपा एमाले निर्वाचित भएका छन् ।

साँगुरीगढी गाउँपालिकामा कांग्रेसका जितेन्द्र राई ५ हजार ३९९ मतसहित निर्वाचित भएका छन् । उनका निकटतम प्रतिस्पर्धी एमालेका कुमारजंग याखाले ४ हजार ८२८ मत पाए ।

साँगुरीगढीको उपाध्यक्षमा भने नेकपा एमालेकी मुना राई निर्वाचित भएकी छन् । राईले ४६५० मत पाउँदा उनका निकटतम प्रतिस्पर्धी जनता समाजवादी पार्टी (जसपा)का लिलाराज लावतीले४१३६ मत पाएका थिए ।

यसैगरी चौबिसे गाउँपालिकाको अध्यक्षमा नेकपा एमालेका राजकुमार लिम्बु ५ हजार ३८ मतसहित निर्वाचित भएका छन् ।

उनका निकटतम प्रतिस्पर्धी नेकपा माओवादी केन्द्रका दलबहादुर मगरले ३ हजार ९९१ मत पाए । धनकुटाका सबै पालिकामा सत्तारुढ गठबन्धन थियो ।

यसैगरी उपाध्यक्षमा पनि नेकपा एमालेकै टंकमाया पाङमी ४ हजार ९८३ मतसहित निर्वाचित भएकी छन् । उनको निकटतम प्रतिस्पर्धी जसपाका मंगल कुमार लिम्बुले ३ हजार ९८८ मत पाए ।

यी दुवै पालिकामा २०७४ को निर्वाचनमा एमालेले जितेको थियो ।