काठमाडौँ, १२ भदौ । काठमाडौँमा मोटरसाइकल र स्कुटर ठोक्किँदा एक जनाको मृत्यु भएको छ । तीन जना घाइते भएका छन् ।

काठमाडौँको गोकर्णेश्वर नगरपालिका–६ मा गएराति साढे ११ बजे भएको दुर्घटनामा प्रहरी प्रभाग साँखुमा कार्यरत प्रहरी हवल्दारको मृत्यु भएको हो ।

बा७६प १३५ नम्बरको स्कुटर र बागमती प्रदेश ०२–०१९प २४७६ नम्बरको मोटरसाइकल ठोक्किँदा स्कुटर चालक शङ्खपुर नगरपालिका–५ पालुवाबारीका ३५ वर्षीय प्रहरी हवल्दार बालकुमार कट्वालको मृत्यु भएको हो । उनको अत्तरखेल मेडिकल कलेजमा उपचारको क्रममा गएराति पौने १२ बजे मृत्यु भएको हो ।

यस्तै, दुर्घटनामा स्कुटरको पछाडि बस्ने जोरपाटीका ३१ वर्षीय सुरेश राई, मोटरसाइक चालक भक्तपुरका सुमन श्रेष्ठ र मोटरसाइकल पछाडि बस्ने रोजित गाइजु घाइते भएका छन् ।

गाइजुको थापाथलीस्थित नर्भिक अस्पतालमा र अरू दुई जनाको त्रिवि शिक्षण अस्पताल महाराजगञ्जमा उपचार भइरहेको प्रहरीले जनाएको छ ।