काठमाडौं, ३० भदौं । वायुसेवा कम्पनीले बुकिङ खुलाउने तयारी गरेको छ । सरकारले आन्तरिक उडान खुल्ने मिति तोकेसँगै कम्पनीले बुकिङ खुलाउने तयारी गरेको हो । त्यसअगाडि कम्पनीहरु कुन-कुन गन्तब्यमा उडान गर्न पाइने र कुनमा नपाइने भन्ने विस्तृत निर्देशनको तयारीमा रहेको जनाईएको छ ।

सरकारले अहिलेसम्म उडान खुला हुने गन्तब्यको सूची दिइ नसकेको नेपाल नागरिक उड्डयन प्राधिकरणका उपमहानिर्देशक राजकुमार क्षेत्रीको भनाई छ । यसअघि १ भदौबाटै उडान खोल्ने निर्णय सरकारले गरेको थियो । सोअनुसार पनि प्राधिकरणले पहिलो चरणमा साविकमा हुँदै आएको उडानको ३३ प्रतिशत मात्र अनुमति दिने गरी वायुसेवा कम्पनीलाई उडानको अनुमति दिएको थियो ।

तर, कोरोना भाइरसको संक्रमण तीव्र रुपमा फैलिएपछि काठमाडौं उपत्यकासहित शहरहरुमा निषेधाज्ञा लागू भयो । त्यसपछि उडान समेत पर सरेको हो । पछिल्लो समय सोमबार बसेको मन्त्रिपरिषद् बैठकले ५ असोजबाट आन्तरिक उडान खोल्ने निर्णय लिएको हो ।