काठमाडौं, २६ असोज । चाडपर्वको अवसर छोपेर बढी भाडा असुल्नेलाई महानगरीय ट्राफिक प्रहरी महाशाखाले ठगीमा मुद्दा चलाउने भएको छ । प्रहरी महाशाखाले चाडपर्वका लागि तयार पारेको सुरक्षा रणनीतिमा बढी भाडा लिनेलाई कारबाही गरिने बताएको हो ।
महाशाखाका प्रमुख प्रहरी वरिष्ठ उपरीक्षक भीमप्रसाद ढकालले चोक चोकमा सादा पोशाकमा ट्राफिक प्रहरी परिचालन गरेर गाडीमाथि निगरानी बढाइने बताए । कोरोना सङ्क्रमण बढेसंगै बसको सिट क्षमताको आधाभन्दा बढी यात्रु बोके ट्राफिक प्रहरीले कारबाही गर्ने जानकारी दिए ।
यसवर्ष उपत्यकाका १४ ठाउँमा नागरिक सहायता कक्ष राख्ने महाशाखाले जनाएको छ । यस्तै टिकट काउण्टरका कर्मचारीले अनिवार्य रुपमा परिचयपत्र भिर्नुपर्ने र राजमार्गमा चालकको मादक पदार्थ सेवन परीक्षण हुने महाशाखा प्रमुख ढकालले बताए । लामो दूरीका सार्वजनिक यातायातमा दुई चालक अनिवार्य नराखे कारबाही गरीने भएको छ । यौनजन्य अपराध नियन्त्रणका लागि अभियान सञ्चालन गरिने महाशाखाले जनाएको छ ।
COMMENTS