काठमाडौँ, १३ पुस । विश्व सम्पदा सूचीमा सूचीकृत हनुमानढोका दरबार क्षेत्रको सांस्कृतिक गतिविधिहरूमा महत्वपूर्ण योगदान पुर्‍याए बापत पूर्वकुमारी, पूर्वगणेश र पूर्वभैरवलाई श्रीपद भत्ता दिने परम्परालाई निरन्तरता दिइएको छ ।

पूर्वकुमारी नौ जना, पूर्वगणेश सात जना र पूर्वभैरव आठ जनालाई श्रीपद भत्ता दिने व्यवस्था गरिएको काठमाडौँ महानगरपालिका हनुमानढोका दरबार संरक्षण कार्यक्रमले जनाएको छ । पूर्वकुमारीलाई मासिक रु १५ हजार र पूर्वगणेश एवं भैरवलाई रु १२/१२ हजार भत्ता दिन लागिएको बताएका छन् । हनुमानढोका दरबार क्षेत्रको सांस्कृतिक गतिविधिमा सहयोग बापत वि.सं. २०६९ देखि सहयोग दिन सुरु गरिएको दरबार संरक्षण कार्यक्रमका प्रमुख रोशन शाक्यले जानकारी दिए । सुरुआती चरणमा पूर्वकुमारीलाई मासिक रु १२ हजार र पूर्वगणेश एवं भैरवलाई रु आठ/आठ हजार भत्ता दिने गरिन्थ्यो । आर्थिक वर्ष २०७७/२०७८ देखि सहयोग बढाएर रु १५ हजार र रु १२/१२ हजार पुर्‍याएको कार्यक्रम प्रमुख शाक्यले बताए ।

इन्द्राजात्रालगायत हनुमानढोका दरबार क्षेत्रमा हुने विभिन्न सांस्कृतिक गतिविधिमा कुमारी, गणेश र भैरवको भूमिका हुन्छ । बहालमा रहेकी कुमारीलाई भने मासिक रु ५० हजार भत्ता दिइन्छ । यसैगरी बहालमा रहेका गणेश र भैरवलाई रु ३०/३० हजार भत्ता दिने गरेको दरबार संरक्षण कार्यक्रमले जनाएको छ । पहिले वार्षिक भत्ता एकैपटक दिने गरेकामा कोरोनाकाल पछि भने छ/छ महिनामा दिन थालिएको छ । कोरोनाकाल पछि हनुमानढोका दरबार क्षेत्रका पर्यटक काउन्टर बन्द भएपछि आम्दानी नभएर दुई किस्तामा भत्ता दिन थालिएको बताएका छन् । महानगरपालिकासँग ऋण लिएर भएपनि पूर्व कुमारी, गणेश र भैरवलाई श्रीपद भत्ता दिने कामलाई निरन्तरता दिइएको कार्यक्रमका लेखा अधिकृत सुन्दरकाजी थुयाजुले बताए । कार्यक्रमको प्रमुख आय स्रोत नै हनुमानढोका क्षेत्रमा आउने पर्यटकको शुल्क रहेकाे छ । विसं २०७६ चैतदेखि पर्यटकका लागि रोक लागेकामा गत साउनदेखि खुला गरिएको थियो ।

हनुमानढोका दरबार क्षेत्रको मूर्त एवं अमूर्त सांस्कृतिक सम्पदा संरक्षणका लागि महानगरपालिकाले २०५८ साल भदौ १ गतेदेखि कार्यक्रमको सुरुआत गरेको हो । कार्यक्रमअन्तर्गत महानगरपालिकाका १९, २०, २३ र २४ गरी चार वटा वडामा फैलिएका सम्पदा संरक्षणको काम हुने गरेको बताएका छन् ।